Nakatakdang makadawat og laing pasidungog si boxing legend ug People’s Champ Manny Pacquiao human gianunsyo nga malakip siya sa Class of 2027 sa U.S. National Boxing Hall of Fame.
Ang pag-anunsyo gihimo sa 3rd Pacquiao-Elorde Awards Night nga gipahigayon sa Manila, diin gikumpirma ni Eric Schmidt ang maong pag-ila.
Una niini, si Pacquiao nasulod usab sa International Boxing Hall of Fame Class of 2025 sa Canastota, New York. Dinhi, nakig-uban niya ang mga Pinoy boxing greats nga sila si Gabriel Elorde ug Pancho Villa.
Nailhan si Pacquiao isip bugtong eight-division world champion sa kasaysayan sa boksing, nga nakadaog og 12 ka dagkong world title ug nakaaway og 22 ka world champion sa tibuok niyang karera.
Sa usa ka sulat gikan sa National Boxing Hall of Fame, si Pacquiao ginganlan nga “Main Event” inductee alang sa Klase sa 2027.
Gidayeg sab ang iyang mga natampo dili lang sa boksing kon dili lakip na sa iyang pagserbisyo sa nasud.
Gipaabot nga motambong si Pacquiao sa induction ceremony nga ipahigayon karong Abril 25, 2027 sa Quiet Cannon sa Montebello, California
Photo Courtesy: Manny Pacquiao
