Daghang mga senador ang mihatag sa ilang suporta sa panawagan alang sa konkretong mga lakang aron mapanalipdan ang mga trabahante nga naglisod na tungod sa kamahal sa presyo sa palaliton ug ubos nga suholan.
Subay sa paghandum sa Labor Day kagahapong adlawa, Mayo 1, 2026, gibutyag ni Senador Francis “Kiko” Pangilinan nga ang padayong pagsaka sa presyo sa lana, pagkaon, ug transportasyon nga miresulta na kini sa pagkahurot sa kita sa mga mamumuo.
Gani, iyang gipadayag nga suportado niini ang maong panawagan alang sa usbaw sa suholan tungod kay dili na maabot sa uban nga mga trabahante ang nagkamahal nga palaliton. Samtang gihatagan niini og gibug-aton nga kinahanglan ang gobyerno maghimo ug mas dekalidad nga trabaho ug ayohon ang mga sistema aron nga matabangan ang mga mamumuo.
Sa pikas bahin, gibutyag usab ni Senador Jinggoy Estrada nga kinahanglan nga lig-onon pa ang suporta sa mga trabahante sama na lamang sa subsidyo ug uban pang hinabang aron mapanalipdan ang ilang panginabuhian.
Subay sa datus, nasayran nga kapin 49 milyones ka Pilipino ang adunay trabaho, samtang milyon-milyon usab ang walay trabaho o nangita ug dugang oras aron makapanarbaho.
Photo Courtesy: Inquirer
