Viral karon sa social media ang usa ka talagsaong hitabo nga nakuhaan og video ni Orlan Flores, principal sa Banayal National High School sa Tulunan, probinsya sa Cotabato.
Sa maong video, makita ang usa ka kanding nga naglakaw-lakaw sa atop sa duha ka andana nga school building. Madungog usab ang principal ug uban pang mga magtutudlo nga naghisgot ug naglibog kung giunsa pagsaka sa maong hayop ngadto sa atop, nga nakapahibulong sa tanang mga nakakita.
Matod pa sa uploader, nakanaog ra gihapon ang kanding human kini miambak gikan sa atop. Maayo na lang, walay kadaot nga nahitabo sa maong insidente.
Padayon gihapon nga naglibot sa social media ang video ug nakadani sa daghang reaksyon gikan sa netizens.
