Hinay ang pagsaka sa ekonomiya sa Pilipinas sa unang quarter sa 2026 tungod sa epekto sa tensyon sa Middle East, sumala sa Department of Economy, Planning and Development.
Matod ni DEPDev Secretary Arsenio Balisacan, dili na angay ikatingala nga mas ubos ang performance sa ekonomiya kumpara sa miaging mga quarter, ilabi na nga nagpadayon pa ang pagbawi gikan sa kontrobersiya sa flood control projects nga nakaapekto sa pagsalig sa mga konsumidor ug sa namuhunan.
Gidugang niya nga ang panagbangi nga naglakip sa Estados Unidos, Israel ug Iran nakahatag og dakong hagit sa ekonomiya, tungod kay ang Pilipinas nagsalig sa suplay sa petrolyo gikan sa Middle East. Kini miresulta sa pagsaka sa presyo sa gasolina, plete, ug uban pang mga palaliton.
Aron malikayan ang mas grabe nga paghinay sa ekonomiya, nagpatuman ang gobyerno og mga lakang sama sa paghatag og pinansyal nga tabang alang sa mga labing apektadong sektor sa katilingban.
Sa laing bahin, ang Philippine Statistics Authority gilauman nga mopagawas sa opisyal nga datos sa Gross Domestic Product (GDP) alang sa unang quarter karong Mayo 7, nga maoy basihan sa pag-review sa growth targets sa gobyerno pinaagi sa Development Budget Coordination Committee.
Alang sa 2026, target sa gobyerno ang 5% hangtod 6% nga pagsaka sa ekonomiya, apan adunay posibilidad nga dili kini maabot. Sumala sa ekonomista nga si Victor Abola, posibleng mosaka lamang sa 4.2% ang economic growth sa tibuok tuig.
Samtang, gilauman usab nga mosaka ang inflation ug moabot sa 6.5% sa Hulyo, uban sa average nga 5.8% alang sa 2026, nga nagpakita sa padayon nga presyur sa presyo sa mga palaliton tungod sa global nga sitwasyon.
