Nabalaka karon ang Department of Justice o DOJ human gikompirma ni OIC Secretary of Justice Fredderick A. Vida, nga wala na sa kustodiya sa mga awtoridad sa Czech Republic ang pugante nga si Elizaldy Co.
Sumala sa kalihim nga gikan sa Prague, gipahibalo sila sa mga otoridad sa Czech nga si Co, wala na nila gigunitan, ug hangtod karon wala pa’y klarong impormasyon kung asa na kini padulong. Gituohang posibleng anaa siya sulod sa Schengen area, diin libre ang paglihok sa mga nasud nga sakop niini.
Gipasabot usab sa DOJ nga limitado lang ang ilang madawat nga detalye tungod sa mga lagda sa data privacy ug Schengen rules, hinungdan nga wala pa’y dugang impormasyon nga mahimong ipadayag sa publiko.
Sa pangutana kung gawasnon ba si Co, mitubag ang kalihim nga “dili na detinado,” ug sa ulahi gikumpirma nga, gawasnon siya sa pagkakaron.
Nasayran usab nga si Co adunay tulo ka passport base sa rekord sa Bureau of Immigration. Apan, usa niini ang paso na kaniadtong 2022, samtang ang usa ka dokumento gi-deklarar nang dili balido sa Sandiganbayan niadtong Disyembre 2025.
Bisan pa niini, nagpadayon ang operasyon sa gobyerno aron madakpan si Co, ilabina kay adunay warrant of arrest batok kaniya kalabot sa giingong anomalyang flood control project sa Oriental Mindoro nga nagkantidad og kapin Php289 milyon.
Sa pagkakaron, nagpabiling misteryo ang eksaktong nahimutangan sa maong pugante samtang nagpadayon ang koordinasyon sa international authorities aron siya matimbog pag-usab.
Photo Courtesy:Philstar
