Gipahibalo sa Department of Energy (DOE) nga miabot na sa nasod ang kinatibuk-ang 178 milyong litro sa diesel isip kabahin sa lakang sa gobyerno aron mapalig-on ang suplay sa lana taliwala sa nagpadayon nga tensyon sa Middle East.
Sumala sa DOE, ang maong shipment maoy nagkompleto sa upat ka kargamento ilawom sa Executive Order No. 110 nga gipagawas ni President Ferdinand Marcos Jr., nga nagtumong sa pagpanalipod sa ekonomiya sa Pilipinas batok sa kalit-kalit nga pag-usab sa presyo sa krudo sa kalibotanong merkado.
Matod ni Energy Secretary Sharon Garin, ang malampusong pag-abot sa maong suplay usa ka ebidensya sa paspas nga aksyon sa gobyerno pinaagi sa Philippine National Oil Company–Exploration Corporation (PNOC-EC) aron masiguro ang igo ug lig-on nga suplay sa fuel sa nasod.
Ang mga kargamento gipang-apod-apod sa mga nag-unang fuel hubs sa Batangas, Subic, ug Davao aron masiguro nga hapsay ang distribusyon ug adunay igong suplay sa tanang rehiyon sa Pilipinas.
Photo courtesy: Business day
