Dakpan ang suspetsado nga mipusil-patay sa usa ka 49-anyos nga si Alejandro Calang, negosyante didto sa Purok 8, Barangay Taglatawan, Bayugan City, niadtong Lunes sa gabii, Abril 27, 2026. Giila sa mga kapulisan ang suspek nga si Rolando Hayag Arsenio, 67-anyos, ug residente sa nahishutang dapit.
Sumala sa report, nahitabo ang krimen bandang alas 9:55 sa gabii. Human makadawat og tawag gikan sa usa ka concerned citizen, daling nipahigayon og hot pursuit operation ang kapulisan nga miresulta sa pagkasikop sa suspetsado. Narekober gikan sa posisyon sa suspek ang usa ka kalibre .45 nga pistola lakip ang magazine niini.
Dugang sa inisyal nga imbestigasyon sa mga otoridad, nakit-an nga adunay panagbangi o reklamo ang biktima batok sa usa ka kauban sa suspek, nga gituohang maoy nahimong hinungdan sa maong pagpamusil.
Samtang human sa maong panghitabo daling gidala sa labing duol nga ospital ang biktima apan gideklara kining dead on arrival sa miatiman nga doktor.
Sa pagkakaron, ang suspek anaa naka kustodiya na sa Bayugan City Police Station alang sa pagpasaka sa tukmang kaso, samtang nagpadayon pa ang lawom nga imbestigasyon sa maong insidente.
Photo Courtesy: Gettyimage
