Miabot na sa 290 ka gasolinahan sa tibuok nasud ang temporaryong nagsira tungod sa kamahal ug nihit nga suplay sa lana, sumala sa Philippine National Police. Base sa pinakabag-ong monitoring sa PNP hangtod Abril 26, kapin 14,500 ka gas stations ang ilang nasusi sa nasud.
Nakarekord usab ang kapulisan og 31 ka kaso nga may kalabutan sa mga paglapas sa petroleum products, lakip ang hoarding, profiteering, ug uban pang ilegal nga kalihokan.
Sa maong numero, siyam ka kaso ang hoarding, usa ang profiteering, samtang 21 ang naglakip sa ilegal nga storage, pagpangawat, ug uban pang paglapas sa regulasyon sa fuel.
Giingon sa PNP nga ang uban sa mga kaso napasaka na sa korte, samtang ang uban padayon pang giimbestigahan.
Matud pa ni PNP Chief Police General Jose Melencio Nartatez Jr., ilang tumong dili lang pagbantay kundi pagsiguro nga walay magpahimulos sa sitwasyon ug maprotektahan ang consumer ug lehitimong negosyo.
Padayon usab ang monitoring sa PNP aron masiguro ang hustong distribusyon sa suplay sa lana sa nasud.
Photo Courtesy:Dreamstime.com
