Patay nang napalgan ang duha ka batang lalaki nga una nang nalumos sa Agusan River sa nakalabayang, Biyernes sa alas-tres sa hapon, human mangaligo ug namasol sa Purok 5, Barangay Bit-os, Butan City.
Sumala ni Barangay Captain Imelda Sheila Fontimar, gi-asoy sa usa ka batang babaye nga naluwas sa insidente nga unang mitidlom ang 8-anyos nga si CJ.
Tungod niini, giluwas siya sa 13-anyos nga si Mark Kyle pinaagi sa paggunit kaniya. Apan, sa dihang misulay usab og tabang ang batang babaye, silang tulo nadala sa kusog nga lilo sa tubig.
Maayo na lang ug adunay nakakita nga nakaluwas dayon sa batang babaye, samtang ang duha ka lalaki wala na makalingkawas.
Napalgan ang unang biktima alas-kwatro sa kaadlawon sa sunod adlaw, ug gisundan usab dayon sa ikaduhang biktima sa maong dapit diin sila nalumos.
Tungod sa maong trahedya, nanawagan si Kapitan Fontimar sa tanang ginikanan nga bantayan ug tutokan kanunay ang ilang mga anak, ug likayan ang pagpaligo o pagduol sa suba kung walay kauban nga hamtong nga kahibalo mulangoy.
