Gisugyot karon sa AFP Army nga iapil og imbistiga sa Commission on Human Rights (CHR) ang (NPA) ilabina sa namatay nga usa ka estudyante sa operations sa isla sa Negros.
Sumala pa ni AFP Chief of Staff General Romeo S. Brawner Jr. nga magpadayon ang ilang intensified operations batok sa mga armadong grupo, samtang ilang tubagon ang mga alegasyon sa paglapas sa human rights.
Kahinumduman nga adunay 19 ka mga gidudahang NPA ang napatay sa military operation sa Toboso, Negros Occidental niadtong nakalabay nga adlaw. Ang target sa operasyon mao ang grupo sa giingong NPA hitman nga si Roger Fabillar, nga wanted sa kasong murder sa maong probinsya.
Apil sa napatay, sumala sa report, ang estudyante nga si Alyssa Alano nga nagtungha sa University of the Philippines. Matod ni Brawner, ang pagpangusog sa operasyon sa Negros Occidental tubag usab sa mga giingong pagpamatay sa mga sibilyan nga gipasanginlan sa NPA nga mga espiya sa gobyerno.
Dugang pa niya, adunay natalang 50 ka mga kaso sa pagpamatay nga giingong binuhatan sa NPA, ug 38 niini nahitabo sa Negros Island.
Gipasalig ni Brawner nga ang kasundalohan naglihok sulod sa balaod. Matod pa niya, kung adunay mapatay sa engkwentro, lagmit nga sila armado ug nakigbatok sa gobyerno.
Matod pa usab ni Brawner nga andam ang AFP sa bisan unsang imbestigasyon ug mosuporta sila niini pinaagi sa paghatag og mga ebidensya, lakip ang mga video ug operational records kabahin sa nahitabo.
Photo Courtesy:PHILIPPINES-UNREST-COMMUNIST
