Nakatigom og kinatibuk-ang savings nga moabot sa ₱361 milyones sulod sa upat ka tuig, gikan sa 2022 hangtod 2026 ang Panggamhanan sa Malaybalay City.
Gibutyag ni City Mayor Jay Warren Pabillaran naggumikan ang maong mga sobra nga kwarta sa mga napatuman nga proyekto sa imprastraktura ug pagpalit sa mga kagamitan pinaagi sa husto ug transparent nga proseso sa bidding.
Gipasiatab sa mayor nga ang maong savings human sa pagsunod sa mga guidelines sa Department of Public Works and Highways (DPWH) ug PhilGEPS nga miresulta sa mas mubo nga gasto itandi sa gialokar nga budget.
Gihisgutan usab sa Mayor nga ang pagdaginot nahimong posible tungod sa iyang estrikto nga kamandoan nga dili manghilabot sa proseso sa bidding. Matod pa niya, gihatagan og patas nga higayon ang tanang kontraktor basta mosunod lang sa balaod, aron makuha ang pagsalig sa mga negosyante sa dakbayan.
Gilauman sa mosunod nga lima ka tuig, nga mas mabuhi ug molambo pa ang ekonomiya sa dakbayan.
Photo Courtesy:LGU Malaybalay
