Nagtingkagol sa selda sa Malaybalay City Police Station ang magtiayon ug laing usa ka lalaki human nadakpan sa akto nga nagdala og mga kinawat nga prutas niadtong nakalabay nga adlaw.
Nailhan ang mga suspetsado nga ang magtiayon nga parehong 39-anyos ug usa ka 20-anyos nga kauban, kinsa nasakpan sa mga nagpatrolya nga pulis sa may Barangay Casisang area samtang nagsakay sa usa ka brand new nga itom nga pickup truck. Nakuha gikan sa ilang posisyon ang kapin kun minus 100 ka kilo nga prutas nga mobalor og 50,000 pesos.
Sumala ni PMSG Kent Hanzel Bughaw sa pakighinabi sa Juander Radyo Malaybalay aduna nay lima ka mga biktima ang niduol sa ilang buhatan aron magpasaka og reklamo batok sa mga suspetsado human nakit-an sab sa mga CCTV footage nga nalambigit sa pagpangawat og uling sa milabay nga mga bulan.
Sa karon gisusi sa kapulisan ang rehistro sa maong sakyanan sa LTO tungod sa kakuwang sa dokumento nga gipakita sa mga dinakpan. Gikatakda nang pasakahan og kasong theft ang mga suspetsado samtang nagpadayon ang imbestigasyon sa uban pang mga insidente sa kawat nga posibleng ilang gikalambigitan.
Samtang, hugot nga gihimakak sa suspetsado kinsa negosyante nga nailang si alyas “Che-Che” ang maong mga pasangil batok kaniya ug gibarugan adunay legal nga mga dokumento sa iyang negosyo.
