Giduso sa Senado ang usa ka balaudnon nga magtugot sa mga produktong petrolyo sama sa diesel ug gasolina nga ipaubos sa pagkontrol sa presyo sa panahon sa krisis.
Diin gisang-at ni Senador Bam Aquino ang maong balaudnon sa tumong nga matubag ang kakulang karon sa Republic Act No. 7581 o ang Price Act, diin ang pagkontrol sa presyo wala maglakip sa mga dagkong produkto sa petrolyo bisan og dako kini og epekto sa presyo sa mga palaliton.
Kun asa ubos sa maong sugyot, ang price control sa lana mahimong ipahamtang sulod sa 30 ka adlaw kon adunay kasamtangang krisis, diin mas taas pa kay sa kasamtangang 15 ka adlaw nga sakop lang sa LPG ug kerosene.
Gihingusgan sa senador nga bisan og dereguladong industriya ang lana, dili angay tugotan nga mosaka ang presyo niini ilabi na kon direktang makaapekto kini sa panginabuhian sa matag katawhan.
Gisang-at ang maong sugyot tungod sa padayong pagsaka sa presyo sa petrolyo tungod sa tensiyon sa Middle East nga maoy hinungdan sa pagsaka sa presyo sa ubang mga nag-unang palaliton.
Nasayran nga luyo sa pagdeklara ni President Ferdinand Marcos Jr., og state of national energy emergency, walay konkretong lakang nga gipatuman aron ma-freeze ang presyo sa lana.
Photo Courtesy: Philippine News Agency
