Nipahigayon og panagtigom ang mga opisyal sa kagamhanang probinsiyal sa Cotabato sa pagpanguna sa Acting Governor sa mga department head aron masiguro nga matuman ang kaluwasan sa tanang Cotabateño atol sa taas nga bakasyon sa Semana Santa.
Tumong sa maong tigom nga masiguro ang luwas nga palibot dili lamang sulod sa kapitolyo kon dili lakip na sa tibuok probinsya.
Gihingusgan usab niini ang kamahinungdanon sa pagpangandam tungod sa gilauman nga dungan nga pagbalik sa mga tawo sa probinsya alang sa pagsaulog semana santa.
Gipahimangnoan ang tanang katawhan nga magmabinantayon ug mosunod sa mga lagda aron malikayan ang bisan unsang insidente atol sa holiday season.
Gisiguro ni Provincial Administrator Aurora P. Garcia nga andam ug magpadayon ang pipila ka mga buhatan sa kapitolyo sama sa mga health worker, emergency responders, field operators, quarantine services, ug uban pa.
Samtang, gipasalig usab ni Cotabato Police Acting Provincial Director PCOL Ramel B Hojilla nga hugot ang ilang pagbantay sa ilang Area of Responsibility (AOR) alang sa luwas ug malinawon nga pagsaulog sa Semana Santa sa Probinsya sa Cotabato.
Photo Courtesy: PGO
