Nagpadayon ang Overseas Workers Welfare Administration o OWWA sa paghatag og nagkadaiyang programa alang sa mga Overseas Filipino Workers o OFWs sa probinsya sa Zamboanga Sibugay. Tumong niini nga mapalambo ang kinabuhi sa mga OFW ug ilang pamilya pinaagi sa pinansyal, edukasyonal, ug pangnegosyo nga suporta.
Sumala sa OWWA, ilang gipalig-on ang mga programa sama sa livelihood assistance, skills training, ug reintegration program aron matabangan ang mga OFW nga makapagsugod og kaugalingong negosyo pagbalik sa nasud. Naghatag usab sila og scholarship ug financial aid alang sa mga anak sa OFWs aron masiguro ang padayon nga edukasyon.
Sa maong programa, daghang OFW ang nakabenepisyo ilabi na kadtong naapektuhan sa pandemya ug pagkawala sa trabaho sa abroad. Dako ang pasalamat sa mga benepisyaryo tungod sa tabang nga ilang nadawat nga nakahatag og bag-ong paglaum sa ilang pamilya.
Padayon ang OWWA sa pag-awhag sa mga OFW nga magparehistro ug magpahimulos sa ilang mga programa aron masiguro ang ilang kaayohan bisan asa man sila sa kalibutan.
