Gipaniguro sa nagkalain-laing grupo sa industriya sa nasod nga dili sila mopahigayon og lay off o pagtangtang sa mga empleyado bisan pa man sa padayong pagsaka sa presyo sa lana ug uban pang palitonon tungod sa krisis.
Sumala sa Federation of Philippine Industries (FPI) ug Management Association of the Philippines (MAP), mas gipili sa mga kompanya ang pagpatuman sa mga lakang sa pagdaginot ug pag-adjust sa ilang operasyon kaysa sa pagpakunhod sa ilang mga trabahante.
Matod ni Elizabeth Lee nga duna pa’y igong imbentaryo ug mga “mitigating measures” aron makaya ang epekto sa krisis, samtang gisugyot usab ni Donald Lim ang pagdaginot sa kuryente, gasolina, ug mga biyahe isip alternatibo sa pagpanangtang og tawo.
Lakip sa mga opsyon nga gilantaw karon sa mga negosyante mao ang pag-implementar sa carpooling, mas mubo nga workweek, ug ang kombinasyon sa onsite ug work-from-home setup aron mamenosan ang gasto sa operasyon.
Bisan pa man niini, nagpahimangno ang mga lider sa negosyo nga kung molungtad og usa ka tuig ang maong krisis, posibleng mosaka pa ang presyo sa pagkaon ug moubos ang “consumer spending” nga mahimong moresulta sa mas estrikto nga mga lakang sa pagdumala.
Sa pagkakaron, nagpabiling prayoridad sa mga kompanya ang paghupot sa ilang workforce samtang seryoso nilang gibantayan ang dagan sa sitwasyon sa kalibutan.
Photo Courtesy:Xinhua
