Nimugna na usab og kasaysayan ang 41-anyos nga NBA superstar nga si LeBron James human niya natabla ang dugay na nga record ni Hall of Famer Robert Parish alang sa labing daghang dula sa kasaysayan sa liga.
Sa iyang pagpakita sa korte kagahapon Marso 20, 2026, nakab-ot ni James ang iyang ika-1,611 nga dula, ang samang gidaghanon nga narekord ni Parish niadtong 1996.
Bisan pa man sa iyang gihambin nga arthritis sa wala nga tiil, wala kini nahimong babag aron ipakita ang iyang dedikasyon sa Los Angeles Lakers batok sa Miami Heat.
Gipakita usab sa tibuok team ang ilang kadasig bisan pa man sa mga injuries nga giatubang nilang Luka Doncic ug Austin Reaves. Matod ni Lakers coach JJ Redick, usa ka dakong testamento sa taas nga kumpiyansa ug sakripisyo sa iyang mga magduduwa ang pagpadayon sa dula luyo sa kakapoy.
Sa iyang bahin, giila ni Robert Parish ang kalampusan ni James ug mipadayag nga wala nay laing mas angayan nga molapas sa iyang “Ironman record” gawas sa 23-season veteran nga si LeBron, kinsa naggunit na usab karon sa mga record alang sa labing daghang All-Star ug All-NBA selections sa kasaysayan sa NBA.
Photo Courtesy: Yahoo Sports
