Ni-resign sa pwesto ang usa ka taas nga opisyal sa seguridad sa Estados Unidos tungod sa nagpadayong gubat sa Iran, dungan sa pag-ingon nga walay dinalian nga hulga (imminent threat) ang nasod batok sa Amerika.
Si Joe Kent, ang direktor sa National Counterterrorism Center ubos sa administrasyon ni Presidente Donald Trump, ni-resign niadtong Martes ug nahimong unang taas nga opisyal nga mibiya sa katungdanan tungod sa panagbangi nga anaa na sa ikatulong semana.
Matod ni Kent sa iyang suwat nga gipatik sa social media, dili madawat sa iyang konsensya ang pagsuporta sa nagpadayong gubat sa Iran. Ang Iran wala nagpakita og dinalian nga hulga ug klaro nga gisugdan sa US kini nga gubat tungod sa presyur gikan sa Israel.
Dugang sa pipila ka mga eksperto, mahinungdanon ang kamatuoran sa usa ka dinalian nga hulga aron mahatagan og katarungan ang pagsugod sa gubat ubos sa International Law.
Si Kent, kinsa naila sa iyang baruganan nga “America First” ug pagsupak sa mga military interventions sa ubang nasod, wala na mohatag og dugang komento. Gikatingala sa pipila ka opisyal ang iyang pag-resign, ilabi na nga suod siya kang Director of National Intelligence Tulsi Gabbard, kinsa nagpabiling hilom sukad nagsugod ang gubat.
Gipakita sa mga intelligence assessment sa wala pa ug samtang nagpadayon ang gubat nga lisod mapukan ang gobyerno sa Iran ug posible kining mobalos batok sa mga pwersa ug kaalyado sa US sa rehiyon.
Photo courtesy: Vox
