Gimando ni Presidente Ferdinand Marcos Jr. ang pagsuspinde sa nakatakdang usbaw sa pamahe (fare hike) sa mga pampublikong sakyanan.
Matod sa Presidente, dili pa kini ang saktong panahon aron mopataas sa pamahe tungod sa padayong epekto sa gubat sa Middle East. Rason nga gimanduan niya ang DOTr nga suspendihon una ang fare hike ug i-defer una kini.
Gipaniguro usab sa Presidente nga dili mapasagdan ang mga transport workers. Sumala pa niya, dugangan ang suporta sa kagamhanan aron dili sila mas maglisod. Lakip sa mga lakang ang pagpatuman sa mga Libreng Sakay sa tibuok nasud nga mahimong pahimuslan sa mga pasahero aron makadaginot sa matag adlaw.
Gawas niini, maghatag usab og diskwento sa pamahe sa MRT ug LRT, ingon man sa mga toll road aron mas maminusan ang gasto sa publiko.
Ang mga lakang kabahin sa dinalian nga tubag sa administrasyon aron mapagaan ang epekto sa tibuok kalibutan nga krisis sa presyo sa lana ug transportasyon.
Photo courtesy: East Asia Forum
