Nagkadaiyang organisasyon ug sektor sa tibuok Sugbo ang mopahigayon og martsa rally karong adlawa Miyerkules, Pebrero 25 isip paghandum sa ika-40 nga anibersaryo sa EDSA People Power Revolution.
Sumala ni Jaime Paglinawan, chairperson sa BAYAN Central Visayas, magsugod ang mobilisasyon alas 8:30 sa buntag sa Freedom Park. Gikan didto, magmartsa ang mga partisipante agi sa Carbon area padulong sa Metro Colon alang sa ilang main program.
Ala 1:30 sa hapon, mopadayon ang martsa paingon sa Basilica Minore del Sto. Niño diin sundan kini og misa nga pangulohan ni Arsobispo Alberto S. Uy.
Matod ni Paglinawan, ang selebrasyon dili lang handumanan sa kasaysayan kondili pakigbatok usab sa korapsyon ug paglapas sa tawhanong katungod. Gilauman nga mokabat sa 400 hangtod 500 ka mga manambong sa buntag ug posibleng modaghan pa sa hapon.
