Gikondina sa Malacañang ang pahayag sa abogado ni kanhi Pangulong Rodrigo Duterte nga si Nicholas Kaufman nga giingong gidaotan lamang ni Pangulong Ferdinand Marcos Jr. ang katungdanan ni Duterte.
Kini misunod sa unang adlaw sa confirmation of charges sa International Criminal Court (ICC), diin giingong adunay nadawat nga tawag sa telepono ug gipanghambog nga magpagawas kuno og mga testigo aron dauton ang kanhi Presidente.
Sumala ni Palace Press Officer Usec. Claire Castro, ang mga alegasyon ni Kaufman batok kang Marcos usa ka klarong binuang.
Dugang pa ni Castro nga daw si Kaufman karon ang adunay sayop nga panglantaw ug dili ang iyang kliyente, tungod kay nakalimtan niini nga ang kasong crime against humanity batok kang Duterte gipasa sa ICC niadtong 2017, panahon nga usa pa ka pribadong lungsoranon si Marcos.
Giinsistir usab ni Castro nga dili angay mahimong isyu ang administrasyon ni Marcos sa maong kaso, ilabi na nga ang giingong mga extrajudicial killings nahitabo pa sa panahon nga mayor pa si Duterte sa Davao City.
Samtang, giingon sa ICC nga adunay direktang kontrol ug naghatag og pinansyal nga suporta si Duterte sa halapad nga pagpatay ubos sa iyang kampanya batok sa ilegal nga droga.
Sa gihimong confirmation of charges hearing niadtong Lunes, diin wala motambong si Duterte, gipadayag ni ICC Prosecutor Mame Mandiaye Niang nga personal umanong gipondohan ug gitutokan sa kanhing pangulo ang mga target sa Davao Death Squad o DDS.
Sumala pa sa prosecutor, dako ang papel ni Duterte sa pag-neutralize sa mga giingong kriminal sa Pilipinas pinaagi sa maong kampanya. Gipasabot usab nga gawas sa regular nga sweldo, nakadawat kuno og cash reward ang mga direktang mipatuman sa pagpamatay isip pabuya.
Photo Courtesy: PCO/ICC
