Gideklarar ni Zohran Mamdani, Mayor sa New York City, ang state of emergency ug citywide shutdown alang sa tanang dili hinanali nga biyahe sa syudad.
Nunot kini sa nasinatian nga record-breaking nga pagbubo sa niyebe o snow nga dala sa grabeng winter storm nga miigo sa ilang lugar.
Lakip sa suspendido ang tanang trabaho sa pipila ka sektor ug klase sa mga tunghaan, samtang gipahimangnoan ang mga motorista nga likayan ang paggamit sa mga kalsada gawas lamang kung adunay emerhensya.
Nagpasalig ang mayor nga ang mga snow plows ug emergency crews gipahimutang na sa mga kritikal nga lugar aron masiguro ang kaluwasan sa mga residente.
Matud ni Mayor Mamdani, dakong hulga ang kasamtangang winter storm sa New York ug gikinahanglan ang pagkahiusa ug disiplina sa katawhan aron malikayan ang disgrasya.
Samtang, gawas sa New York, nagpagula na usab og mga abiso ang mga opisyal sa mga estado sa New Jersey, Delaware, Pennsylvania, ug Connecticut nga naapektuhan usab sa grabeng pagbubo sa niyebe.
Bisan pa sa dakong hulga sa panahon, daghan gihapong mga residente ang nanggawas sa ilang mga panimalay aron masinatian ang giingong “once in a lifetime” nga record-breaking winter storm sa Estados Unidos.
Photo Courtesy: Fortune
