Usa ka makasaysayan ug delikadong aviation stunt ang malampusong nahimo sa Italian pilot nga si Dario Costa human siya mahimong unang tawo nga nakapalanding og eroplano sa ibabaw sa usa ka nagdagan nga tren.
Gamit ang iyang Zivko Edge 540 nga eroplano, eksakto niyang napa-landing ang aircraft sa gamay nga runway nga gibutang sa pinakaulahing bagon sa tren, sa wala pa kini molupad pag-usab padulong sa kahanginan.
Sa dihang gihimo ang stunt, nagdagan ang tren sa kapaspas nga 120 kilometro matag oras. Tungod sa anggulo sa pagpaubos sa eroplano ug sa padayon nga lihok sa tren, nahimong “blind landing” ang sitwasyon kay dili klaro makita sa piloto ang iyang landing spot. Nagsalig lamang si Costa sa iyang pag-focus, instinct, ug cognitive skills aron matul-id ang alignment sa eroplano.
Sumala sa piloto, nagsugod ang iyang pagpangandam niadtong 2024 pinaagi sa advanced simulation technology ug controlled ground rehearsals, tungod kay dili posible ang aktuwal nga pagpraktis sa ibabaw sa usa ka nagdagan nga tren.
Ang maong stunt giila isip usa sa labing lisod ug peligroso nga aerial maneuvers nga nahimo sa modernong aviation.
Photo Courtesy: Oddity Central
