Gi-alerto sa hepe sa Philippine National Police (PNP), si Jose Melencio C. Nartatez Jr., ang tanang police units sa tibuok nasud subay sa pagsugod sa pagdungog sa International Criminal Court (ICC) batok kang kanhi Presidente Rodrigo Duterte karong adlawa, Pebrero 23.
Sumala kang Nartatez, gibantayan karon sa PNP ang posible nga mass gatherings ug mga rally aron masiguro nga mapadayon ang kalinaw ug kahusay sa publiko samtang nagpadayon ang mga kalihokan nga may kalabotan sa ICC hearing.
Gimando usab sa PNP chief ang mga rehiyonal nga yunit sa pag-preposisyon sa mga grupo sa Civil Disturbance Management (CDM) sa nagkadaiyang lugar, ilabi na sa mga dakbayan nga posibleng pagahimuan og tigum o protesta. Gisiguro usab nga ang mga medical emergency responders naka-standby aron motubag dayon sa bisan unsang emerhensiya nga mahitabo.
Bisan pa sa kahimtang, gipasabot ni Nartatez nga girespeto sa PNP ang katungod sa mga lungsoranon sa pagpadayag sa ilang mga panglantaw ug baruganan. Apan iyang gipasiugda nga ang kaluwasan sa publiko nagpabiling prayoridad sa kapulisan.
“Ang maximum tolerance hugot nga sundon sa among mga personahe, apan ipadayon gihapon ang pagpatuman sa balaod,” matod ni Nartatez. Giduso usab niya ang mga pulis nga magpabiling propesyonal ug likayan ang bisan unsang komprontasyon samtang nag-atubang sa mga rallyista.
Ang kanhi presidente mopailawom sa pre-trial nga “confirmation of charges” hearing sa ICC sa The Hague, Netherlands, kabahin sa mga alegasyon sa krimen batok sa katawhan nga may kalabotan sa iyang kampanya batok sa ilegal nga droga.
Photo Courtesy: PNP
