Napatay sa gilusad nga security operation sa militar sa Mexico ang giila nga most wanted drug lord ug lider sa gikalisangang Jalisco New Generation Cartel (CJNG) niaging adlaw
Gikumpirma sa awtoridad nga si Nemesio Oseguera Cervantes, mas nailhan sa bansag nga “El Mencho,” namatay human sa operasyon nga gihimo kagahapon sa lungsod sa Tapalpa sa estado sa Jalisco.
Sumala sa taho, nakaangkon og grabeng samad-pinusilan si Oseguera atol sa sagupaan tali sa militar ug mga miyembro sa CJNG. Gidali siya og airlift padulong sa Mexico City alang sa emerhensiyang pag-atiman, apan gideklarar nga patay sa pag-abot sa ospital.
Gipadayag sa defense ministry nga pipila usab ka mga miyembro sa CJNG ang napatay sa maong operasyon. Nakumpiska sab militar ang daghang armoured vehicles ug mga kagamitang panggiyera, lakip ang mga rocket launchers. Tulo ka sundalo usab ang naangol sa insidente ug gidala sa ospital sa Mexico City alang sa tambal.
Ang CJNG, nga nagsugod sa Jalisco, mikaylap na sa nagkadaiyang bahin sa Mexico ug giila nga usa sa labing makusog ug mapintas nga drug cartels sa nasud.
Samtang nagpadayon ang operasyon batok sa grupo, ang United States Department of State nag-isyu og shelter-in-place warning alang sa ilang pwersa nga anaa sa Jalisco, ingon man sa mga estado sa Tamaulipas, Michoacán, Guerrero, ug Nuevo León.
Gipadayag usab sa Mexican defense ministry nga ang Estados Unidos naghatag og intelihensiyang impormasyon nga nakatabang sa kalampusan sa operasyon.
Sa laing bahin, si Christopher Landau, kanhi US ambassador to Mexico ug Deputy Secretary of State, mipahayag sa social media nga ang kamatayon ni “El Mencho” usa ka dakong kalamboan alang sa Mexico, Estados Unidos, Latin America, ug sa tibuok kalibutan sa pakigbatok batok sa illegal nga droga.
Photo Courtesy: AOL
