Andam nga mag-isyu ug Show Cause Order ang National Police Commission (NAPOLCOM) Region 9 batok sa usa ka miyembro sa kapulisan nga nalambigit sa gikaingong insidente sa checkpoint operation sa Land Transportation Office Region 9.
Matod ni Regional Director Pablito M. Abad Jr., gihimo kini subay sa direktiba ni Rafael Vicente R. Calinisan, nga nagmando nga paspasan ang pag-imbestiga batok sa mga kapulisan nga malambigit sa iregularidad, ug dili maayong pamatasan.
Sa viral video nga mikaylap sa social media niadtong Pebrero 19, 2026, ang maong pulis nakita nga wala motuman sa instruction sa checkpoint ug kalit nga misutoy ug padagan sa gisakyang motorsiklo sa checkpoint sa LTO sa Urro Street, San Jose District sa Pagadian City.
Tungod niini, gimandoan ang maong pulis nga magsumite ug sulat pagpasabot aron matimbang kon angay ba siyang kasuhan ug administratibo kalabot sa maong insidente.
Samtang gisiguro sa NAPOLCOM 9 nga ang maong kaso dili nila palabyon subay sa balaod aron masiguro ang accountability sa matag partido nga nalambigit.
