Nanawagan ang Catholic Bishops’ Conference of the Philippines (CBCP) ngadto sa mga magtutuo nga buhaton ang “digital fasting” karong panahon sa Kuwaresma aron mas molawom ang espirituhanong pagpamalandong.
Pinaagi sa usa ka pastoral letter nga giulohan og “Fasting Beyond Food: Inviting Christ into Digital Media Use,” gipasabot sa mga obispo nga ang Kuwaresma, nga magsugod karong Pebrero 18, maoy higayon sa pagbalik sa Ginoo pinaagi sa pag-ampo ug pagpuasa.
Matod sa CBCP, gawas sa naandan nga paglikay sa pagkaon, mahimo usab nga i-ayuno ang sobra nga paggamit sa cellphone, social media, streaming, ug online games. Giklaro sa ahensya nga kining maong mga digital nga kalihokan sagad makabalda sa relasyon sa tawo ngadto sa Dios ug makapawala sa pokus sa tinuod nga kahulogan sa pagpenitensya.
Wala gidili sa mga obispo ang teknolohiya, apan gidasig nila ang publiko sa pagsusi kon giunsa kini paggamit subay sa giya ni Kristo. Pipila sa mga sugyot sa CBCP mao ang paglikay sa paggamit sa telepono sa dili pa matulog ug inig mata sa buntag, ang pagpatuman sa “device-free meals” uban sa pamilya, ug ang paggahin og 24-oras nga hingpit nga pagpalayo sa bisan unsang gadyet.
Ang maong panawagan gipirmahan ni CBCP President ug Lipa Archbishop Gilbert A. Garcera. Matod niya, ang tumong sa digital fasting mao ang paghatag og kalinaw sa huna-huna ug paghatag og dugang oras alang sa mas makahuloganong komunikasyon sa isig-katawo ug sa Magbubuhat sa tibuok panahon sa Kuwaresma.
Photo Courtesy: Grace Bible Church
