Padayon ang pag-uswag sa teknolohiya, diin gipalig-on sa Department of Information and Communications Technology (DICT) ang ilang mga programa aron suportahan ang mga estudyante sa tibuok nasud.
Gipasiugdahan sa DICT ang nagkalain-laing inisyatibo sama sa libreng digital skills training, paghatag og libreng internet access sa mga pampublikong eskwelahan, ug paghatag og ICT equipment aron mapalambo ang kahibalo sa kabatan-onan sa teknolohiya.
Sumala sa DICT, tumong sa maong programa nga mapakunhod ang digital divide ug masiguro nga ang mga estudyante, ilabi na sa mga probinsya, adunay patas nga access sa online learning resources. Lakip sa mga programa ang pagpatuman sa Free Wi-Fi for All sa mga pampublikong lugar ug eskwelahan, ingon man ang mga training workshops sa coding, cybersecurity, ug digital literacy.
Dako ang pasalamat sa mga estudyante nga nakabenepisyo sa programa tungod kay dako kini’g tabang sa ilang pagtuon, labi na sa research ug online classes. Padayon ang paningkamot sa DICT nga mapalapad pa ang ilang serbisyo aron mas daghang kabatan-onan ang makabenepisyo sa teknolohiya.
Alang sa dugang detalye mahitungod sa mga programa sa DICT, mahimong mobisita sa ilang opisyal nga social media pages ug website.
Photo Courtesy: DICT ZAMBOANGA SIBUGAY FB PAGE
