Giaghat ni Gobernador Rogelio Neil Oneil Roque ang mga high-ranking officials sa New People’s Army (NPA) nga mobalik sa sabakan sa balaod aron makab-ot ang kalinaw ug mapahunong ang pagkamatay sa isig ka Pilipino, atol sa press conference nga gipahigayon sa 403rd Peacemaker Brigade sa Impalambong, Malaybalay City Pebrero 17, 2026
Matod ni Roque, andam ang lalawigan sa paghatag og livelihood programs ug nagkalain-laing suporta alang sa mga rebelde nga magbalik-loob sa gobyerno samtang gipanwagan ang mga opisyales sa Misamis Oriental nga magdoble-time sa paningkamot sa pagdasig sa mga lider sa rebelde nga mosurender.
Sa karon, base sa obserbasyon sa 4th Infantry Division sa Philippine Army, tulo na lamang ka iladong lider sa NPA sa North Central Mindanao Regional Committee ang aktibo: sila si Julia Cagadas alyas “Ka-Reda,” alyas “Kakoy,” ug alyas “Jakim.” Kini human sa pagkamatay ni alyas Tado sa engkwentro sa La Paz, Agusan del Sur sa miaging adlaw.
Gipasalamatan usab ni Major General Michele Anayron, commander sa 4ID, ang mga operating unit commanders sulod sa probinsya sa Bukidnon sa ilang paningkamot ug kalampusan, lakip ang suporta sa Philippine Air Force sa pagpasiugda sa focused military operations sa 4ID.
Gipaabot ni MGen Anayron ang pasalamat sa Provincial Government of Bukidnon pinaagi ni Gobernador Roque, sa mga local chief executives sa mga local government units, ug sa tanang lider sa lalawigan sa suporta nga gihatag ngadto sa kasundaluhan.
Ang mga aksyon ug panawagan sa gobyerno ug kasundaluhan nagpunting sa malungtarong kalinaw ug pagpakunhod sa insurhensya sa rehiyon.
Photo Courtesy: 4O3rdIB PA
