Angol ang usa ka 24-anyos nga lalaki nga nagmaneho og motorsiklo human kini mabanggaan sa usa ka Nissan Almera sa Purok Avocado, Barangay Buenavista, Pagadian City, pasado alas dos sa hapon niadtong Nobyembre 2, 2026.
Base sa inisyal nga imbestigasyon sa kapulisan, nagbiyahe ang Nissan Almera nga gimaneho sa usa ka 44-anyos nga babaye ug residente sa maong barangay padulong unta sa usa ka carwash establishment.
Apan samtang nagmaniobra ang sakyanan ug nakatabok na sa pikas lane, kalit kining nabanggaan sa Suzuki Raider FI 125 nga gimaneho sa biktima, nga residente sa Guipos, Zamboanga del Sur.
Tungod sa kusog nga impact, nakaangkon og mga bun-og sa lawas ang motorista. Nadaot usab ang atubangang bahin sa motorsiklo ug ang driver’s side door sa Nissan Almera.
Dali nga miresponde ang Bureau of Fire Protection (BFP) ug gihatagan og medikal nga pagtabang ang naangol nga motorista. Gikumpirmang luwas na ang iyang kahimtang.
Samtang, gidala sa Pagadian City Police Station ang duha ka sakyanan alang sa dugang nga imbestigasyon ug hustong disposisyon.
