Nakasakmit og lima ka award ang 43 ka batan-on gikan sa Island Garden City of Samal human nila ipakita ang ilang talento ug abilidad sa nagkadaiyang kompetisyon atol sa 2026 Provincial Youth Congress (PYC) nga gipahigayon sa RDR Gymnasium and Cultural Center, Davao del Norte, niadtong Oktubre 31, 2026.
Nakuha sa mga Samalenyo ang unang pwesto sa Piko o Laro ng Lahi, ikaduhang pwesto sa Tagisan ng Talino, ug ikaupat nga pwesto sa Modern Dance Competition, Poster Making ug Sack Race.
Gipangunahan sa Davao del Norte Provincial Sports and Youth Development Office (PSYDO), kauban ang Sangguniang Kabataan (SK) Provincial Federation ubos sa pagpangulo ni SK Provincial Federation President Helen Mae I. Discaya, ang maong kalihokan nga gitambongan sa mga batan-ong delegado gikan sa 12 ka lungsod ug dakbayan sa tibuok lalawigan.
Sa iyang State of the Youth Address, gipasiugda ni Discaya ang kamahinungdanon sa pag-amuma sa mga batan-ong lider ug paghatag kanila og mga kahigayonan nga mapalambo ug mapakita ang ilang mga abilidad.
Mitambong usab sa kalihokan si Davao del Norte Vice Governor Clarice T. Jubahib, kauban ang mga pangulo sa SK Federation gikan sa nagkadaiyang lokal nga kagamhanan sa probinsya.
Tumong sa tinuig nga Provincial Youth Congress nga mapalig-on ang panaghiusa, pagkat-on ug aktibong pag-apil sa mga batan-on sa mga kalihokan alang sa ilang kalamboan.
Photo Courtesy: Samal Island Information
