Natapos na sa Davao Norte Police Provincial Office (DNPPO) ang ika-5 nga batch sa Revitalized-Pulis sa Barangay (R-PSB) Training alang sa tuig 2026 atol sa closing ceremony nga gipahigayon kagahapong adlawa Nobyembre 3, 2026, sa DNPPO Kapanalig Hall, dakbayan sa Tagum.
Milungtad og 16 ka adlaw ang maong pagbansay diin gihatagan og pag-ila ang mga partisipante nga malampusong nakakompleto sa programa, human sila nasangkapan og dugang kahibalo, kahanas ug abilidad sa pagpakig-alayon sa komunidad, pagpalig-on sa kalinaw ug pagsulbad sa mga problema sa matag barangay.
Sa mensahe ni DNPPO Provincial Director PCOL Glenn G. Cristines, dako ang papel sa R-PSB Program sa pagpalig-on sa panag-uban tali sa kapulisan ug komunidad, ingon man sa pagsuporta sa mga inisyatiba sa gobyerno alang sa kalinaw ug kahapsay.
Giawhag usab niya ang mga partisipante nga gamiton sa aktuwal nga pagserbisyo sa publiko ang ilang nakat-unan, ilabi na sa ilang tagsa-tagsa ka deployment areas.
Mitambong usab sa kalihokan ang mga opisyal gikan sa Regional Education and Training Division, Regional Special Training Unit 11, ug Regional Community Affairs and Development Division 11.
Pinaagi sa maong programa, padayon nga gipalig-on sa DNPPO ang panag-alayon sa kapulisan ug katawhan alang sa mas malinawon, luwas ug lig-on nga komunidad sa tibuok Davao del Norte.
Photo Courtesy: DNPPO
