Gisentensiyahan sa usa ka korte sa Hong Kong ang pro-democracy media mogul nga si Jimmy Lai og 20 ka tuig nga pagkabilanggo human makit-ang guilty sa mga kaso ubos sa national security law nga gipahamtang sa Beijing.
Si Lai, 78 anyos ug founder sa Apple Daily newspaper, nakondinar sa duha ka ihap sa foreign collusion ug usa ka ihap sa seditious publication. Ang maong kaso gikondena sa mga Human Rights Groups ug Western Countries isip hulga sa press freedom sa Hong Kong.
Sumala sa korte, grabe ug seryoso ang kriminal nga binuhatan ni Lai busa gitino nga angay siyang sentensiyahan og 20 ka tuig nga prisohan.
Duha ka tuig sa sentensiya ang mokonkur sa iyang kasamtangang sentensiya, hinungdan nga dugang nga 18 ka tuig pa ang iyang pagaserbisyohan. Si Lai anaa na sa prisohan sukad 2020.
Gikondena sa mga international media watchdogs ang sentensiya ug giingon nga kini adunay dakong epekto sa kaugmaon sa freedom of the press sa Hong Kong. Samtang niini, gisalikway sa Beijing ug sa mga awtoridad sa Hong Kong ang mga batikos ug miingon nga ang kaso walay kalabotan sa freedom of speech ug freedom of the press.
Photo Courtesy: Wikipedia
