Giawhag sa Department of Science and Technology (DOST) ang micro, small, ug medium enterprises (MSMEs) nga gamiton ang robotics ug automation aron mapalapad ang operasyon, modako ang produksyon, ug makahatag og mas daghang trabaho.
Sa interbyu giingon ni Albert Causo sa DOST Balik Scientist nga ang CUATRO Program nagtudlo sa mga negosyo sa paggamit sa robotics, artificial intelligence (AI), ug Industry 4.0 technologies aron mapaayo ang productivity.
Gipasabot ni Causo nga supak sa kahadlok nga makapawala og trabaho ang automation, kini mopauswag sa trabaho ug mosuporta sa panginahanglan sa tawo. Pinaagi sa on-site assessment, matino kung asa nga buluhaton ang angay i-automate, labi na ang repetitive o delikado nga proseso, aron hinay-hinay nga mag-modernize ang negosyo nga dili mahal ang gasto.
Gi-awhag usab niya ang gagmay ug medium enterprises nga sugdan na ang paggamit sa modernong teknolohiya. Ang taas nga gasto masulbad pinaagi sa return on investment computation ug tabang sa financing support sa DOST SETUP program, nga naghatag og zero-interest loans.
Daghang MSMEs ang nadugangan ang produksyon ug workforce human gamitan ang automation, tungod sa mas maayo nga kalidad ug ubos nga gasto. Naglaum ang DOST nga mas daghang negosyo ang mag-modernize, magpabilin kompetitibo, ug makahatag og mas daghang trabaho samtang nagalihok ang nasud padulong sa advanced manufacturing.
Photo Courtesy: PNA
