Naglunsad ang Philippine National Police (PNP) og crackdown batok sa mga signage ug tarpaulin nga adunay ngalan ug hulagway sa mga politiko sa mga proyekto ug kabtangan nga gipondohan sa gobyerno.
Matod ni PNP Chief Gen. Jose Melencio Nartatez Jr., tumong niini nga maprotektahan ang integridad sa serbisyo publiko.
“Ang kuwarta sa lungsod alang sa lungsod. Ang mga proyekto sa gobyerno dili angay tan-awon nga gipanag-iya sa usa ka tawo. Iya kini sa katawhang Pilipino.”
Gimandoan niya nga kuhaon dayon ang bisan unsang materyal nga nagpakita sa personalidad sa opisyal sa mga proyekto ug programa sa gobyerno. Dili sab angay gamiton ang serbisyo publiko sa personal nga pagpakita o pagpaila.
Ang direktiba sa PNP nalatid sa memorandum niadtong Feb. 2, nga gibase sa DILG Memorandum Circular 2026-006. Ang mga opisyal ug kawani nga dili mosunod manubag subay sa naglungtad nga balaod ug regulasyon.
Gihisgotan sa DILG nga ang 1987 Konstitusyon, Code of Conduct, ug 2026 General Appropriations Act klaro nga nagdili sa pagbutang og ngalan ug hulagway sa opisyal sa mga proyektong gipondohan sa gobyerno.
Ang tanang opisyal ug kawani gimandoan nga ipatuman dayon ang pagtangtang ug pagtul-id sa mga materyales nga dili mosunod, ug ang mga pangulo sa opisina manubag sa hingpit nga pagtuman sa direktiba.
Photo courtersy: Philippine National Police/ Facebook
