Gikasubo sa lokal nga panggamhanan sa Cagayan de Oro City ang pagkamatay sa upat ka miyembro sa usa kapamilya human nga natabunan sa pagdahili sa yuta sa Zone 1, Sambulawan, Barangay Agusan, sa dakbayan sa nilabayng gabie, tungod na pud sa pag-ulan nga dala sa Tropical Storm Basyang.
Atol sa live coverage sa City Information Office, gipamahayag ni Sheila B. Lumbatan, Chief of Staff to the City Mayor nga nagpaabot na og hinabang ang syudad alang sa mga casualty, lakip na diha ang financial, burial assistance ug uban pang panginahanglan isip suporta sa nahabilin nilang pamilya.
Giila ang mga biktima nga sila Paul Lariosa, Ruffa Lariosa, Aliyah Mira Acmid, ug Rhealove Salubo.
Samtang gipunting sab ni Lumbatan ang pagtinabangay sa tanan, gikan sa kabarangayan, mga personahe sa syudad ug nasudnong mga buhatan aron nga muresponde sa susamang katalagman ug gipasalamatan ang sakripisyo sa tanan labi pa nga sa wala pa niabot ang bagyo pila ka adlaw ang ilang gihimong pagpangamdam.
Alayon niini, gipahiluna karun sa mga Opisyal sa Brgy. Bulua ang 17 ka pamilya gikan sa mga nagkada-iyang Zone sa Barangay diin ang kadaghanan gikan sa Zone 9 Anhawon.
Gihatagan sila og pamainit sa mga kawani sa Barangay ingon man sa ilang pamahaw. Giklaro ni Kagawad Jeferson Aba nga dili pa makabalik ang mga lumulupyo sa ilang mga balay hangtod nga dili pa mabalik sa normal ang lakat sa panahon.
Kahibaluang nikabat sa 396 ka pamilya kon 1,217 ka indibidwal ang namakwit sa nagkadaiyang evacuation center sa syudad human naapektuhan sa Tropical Storm Basyang.
Samtang sa tibuok probinsya sa Misamis Oriental, nikabat sa 9, 339 kapamilya kon 32, 750 katao ang nibakwit sa kinse ka mga syudad ug munisipalidad sa probinsya.
Photo courtesy: CDRRMD
