Nagpasaka og reklamong kriminal ang Securities and Exchange Commission (SEC) batok sa Villar Land Holdings Corp. ug sa mga tag-as nga opisyal niini, lakip na ang pamilya ni kanhi Senador Manny Villar, tungod sa mga alegasyon sa market manipulation ug insider trading.
Sa reklamo sa SEC, lakip sa mga gihinganlan nga respondents sila si Manny Villar Jr., kanhi Senadora Cynthia Villar, ug ang ilang mga anak nga sila si Manuel Paolo, Mark, ug Camille Villar.
Matod sa komisyon, nagsugod ang kaso sa giingong malinglahon nga financial disclosures sa kompanya niadtong 2024 nga nagpadako sa ilang total assets ngadto sa Php1.33 trilyon, apan nigawas sa audit mao lamang ang Php35.7 bilyon.
Gikasohan usab ang mga kaalyadong kompanya nga Infra Holdings Corp. ug MGS Construction sa paghimo og artificial demand aron patas-an ang presyo sa mga stocks.
Gikasohan usab sa insider trading si Camille Villar human giingong nipalit og libu-libong shares sa wala pa ang usa ka importante nga anunsyo sa kompanya niadtong 2017.
Gihatagan og gibug-aton ni SEC Chairperson Francis Lim nga dili nila palampasaon ang bisan unsang mga malinglahon nga buhat (fraudulent acts) nga nag-ilad sa mga investor ug nagguba sa integridad sa merkado sa Pilipinas.
Photo courtesy: Philippine Information Agency
