Nasinati sa Golden State Warriors ang pito ka puntos nga pildi sa mga kamot sa No. 1 team sa Eastern Conference, ang Detroit Pistons. Kulang ang gihimong comeback sa Golden State sa katapusang quarter aron papason ang 13-puntos nga biya, ug nasinati ang 131-124 nga kapildihan.
Miusab sa pagpakita og epektibong performance ang Detroit guard nga si Cade Cunningham pinaagi sa iyang 11-of-19 field goals ug nipupo og 29 puntos, lakip na ang lima ka free throw. Nakakuha usab siya og 11 ka assists, usa ka block, ug upat ka rebounds.
Pito ka players sa Pistons ang nitapos nga adunay double-digit nga iskor, ug duha ang nitala og double-double nga performance.
Nakawang usab ang 23 puntos sa NBA superstar nga si Stephen Curry sa laing pagkapildi sa Warriors. Ang nindot nga performance ni Curry naputol sa ikaduhang bahin sa dula human siya nigawas sa hardcourt tungod sa sakit sa tuhod.
Gipaningkamotan pa sa Golden State nga ipadayon ang dula apan wala magmalampuson ang 18 ka 3-pointers nga napasulod sa team tungod kay gihugtan sa Pistons ang pagbantay sa paint area. Nakahimo ang Pistons og 62 puntos sa paint samtang 40 puntos lamang ang natubag sa 2022 NBA champion.
Gigamit sa Pistons ang paspas nga dula (fast-paced game) batok sa team sa 37-anyos nga si Curry. Sa kinatibuk-an, nakakuha ang Pistons og 25 ka fast break points samtang napulo lamang ang nahimo sa Warriors.
Photo courtesy: Macomb Daily
