Kapin sa 200 ka tawo ang namatay human nahugno ang usa ka minahan sa Rubaya, sa sidlakang bahin sa Democratic Republic of Congo, sumala sa mga nga awtoridad sa rehiyon.
Matod ni Lumumba Kambere Muyisa, tigpamaba sa gobernador sa North Kivu, nahugno ang minahan niadtong Miyerkules tungod sa kusog nga pag-ulan. Lakip sa mga nangamatay ang mga babaye, bata, ug mga artisanal miners nga nagmina og coltan—usa ka mineral nga gigamit sa paghimo og mga elektronikong kagamitan sama sa smartphones ug computers.
Usa ka kanhi supervisor sa minahan ang nag-ingon nga wala maayo pagka-mentinar ang site, hinungdan nga daling nahitabo ang aksidente ug naglisod ang mga rescue effort. Dugang pa niya, ang humok ug daling matumpag nga yuta sa dapit ang nakapasamot sa sitwasyon.
Gibanabana nga 20 ka survivors ang kasamtangang gitambalan karon sa ospital. Usa sa mga kabanay sa biktima ang nipahayag sa ilang dako nga kaguol, ug gihulagway ang mga namatay isip mga maisog ug kugihan nga mga tawo kansang tumong lamang ang pagbuhi sa ilang pamilya.
Gibisita ni Gobernador Erasto Bahati Musanga, nga gitudlo sa mga rebeldeng M23, ang mga survivor niadtong Biyernes. Kasamtangang kontrolado sa M23 ang Rubaya ug pipila ka bahin sa North Kivu, ug sumala sa mga international observers, gitabangan sila sa nasud nga Rwanda.
Nasayran nga ang Rubaya usa sa mga lungsod sa North Kivu nga kontrolado sa M23. Ang minahan niini naghupot sa 15% sa tibuok kalibutan nga suplay sa coltan ug katunga sa kinatibuk-ang deposito sa DR Congo. Ang coltan mahinungdanon kaayo sa paghimo og mga high-performance capacitors alang sa nagkalain-laing ekipo, hinungdan nga taas kaayo ang demand niini sa tibuok kalibutan.
Sukad niadtong 2024, kontrolado na sa mga rebeldeng M23 ang mga minahan, ug giakusahan sila sa United Nations nga nagpahamtang og buhis sa pagmina alang sa ilang kaugalingong kaayohan.
Photo courtesy: News Arena
