Wala na hatagi og higayon sa San Miguel Beermen ang TNT Tropang 5G nga maka-abot pa sa Game Seven sa ilang championship series human gipildi kini sa Season 50 PBA Philippine Cup kagabii sa MOA Arena, Pasay City.
Nanguna si nine-time PBA MVP June Mar Fajardo nga nakapuntos og 29 puntos ug 23 rebounds. Gisundan siya ni CJ Perez (19 puntos), Rodney Brondial (15 puntos), ug Marcio Lassiter (13 puntos). Ang San Miguel misira sa serye sa kartadang 4-2 sa best-of-seven nga panagsangka batok sa TNT, aron makuha ang ika-12 nga korona sa Philippine Cup ug ang ika-31 sa kinatibuk-an sukad 1975.
Nalabwan sa Beermen ang pagbangon sa Tropang 5G gikan sa 21 puntos nga deficit sa first period, ug sa 66-68 nga score sa 1:58 minuto sa third quarter, aron makaposte og 85-73 nga lead sa 4:01 minuto sa final canto. Ang duha ka sunod nga basket ni Brondial nagpalayo sa San Miguel sa 89-73 sa nahibiling 3:07 minuto sa duwa.
Gipangunahan ni Calvin Oftana ang TNT uban sa iyang 28 puntos, lakip ang unom ka three-point shots. Gisugdan sa San Miguel ang duwa sa 12-0 nga run, gilapdan ngadto sa 20-2, pinaagi sa duha ka sunod nga tres ni three-point king Marcio Lassiter. Ang basket ni Fajardo sa 3:34 minuto nagpalubong sa TNT sa 24-5, hinungdan nga gitawag ni coach Chot Reyes ang iyang ikatulong timeout sa first period.
Photo Courtesy: PBA
