Patay ang 15 ka tawo sa usa ka plane crash, lakip ang usa ka Colombian lawmaker, human kini nahagsa niadtong Miyerkules sa bukirang dapit duol sa border sa Venezuela, sumala sa mga awtoridad sa Bogota.
Ang eroplano nibyahe gikan sa Cucuta, usa ka border city sa Colombia, ug nawala ang kontak sa air traffic control bag-o pa kini molanding sa Ocana, nga nakatakda unta nga molanding mga 23 minutos human sa take-off.
Sa 15 ka sakay, adunay 13 ka pasahero ug duha ka crew members. Gipahibalo sa opisyal sa aviation authority nga walay naluwas, ug wala pa’y klaro ang hinungdan sa pagkahagsa niini.
Gipadala sa gobyerno ang Air Force aron mangita sa maong lugar nga kabukiran ug daghan ug siksik nga kakahoyan, ug lisod maagian tungod sa kahimtang sa panahon. Pipila ka bahin sa palibot kontrolado sa ELN, ang pinakadako nga guerrilla group sa Colombia.
Usa sa mga namatay mao si Representative Diogenes Quintero, 36-anyos, ug si Carlos Salcedo, kandidato sa umaabot nga eleksyon.
Giingon sa presidente sa Colombia nga si Gustavo Petro nga nasubo siya sa kamatayon sa mga sakay sa eroplano ug nagpaabot sa iyang pahasubo sa ilang mga pamilya.
Gihulagway sa partido ni Quintero nga siya usa ka lider nga dedikado sa iyang komunidad. Natawo siya sa Catatumbo, usa ka rehiyon nga apektado sa armed conflict ug coca crops.
Ang eroplano usa ka Beechcraft 1900 twin-propeller plane. Tungod sa kabukiran ug kakahoyan, daghang lugar sa Colombia ang lisod sudlon, busa importante ang eroplano nga transportasyon.
Photo Courtesy: DW.com
