Nagpasalig ang pamilya ni Oscar Dodong Bucol, kanhi Kapitan sa Barangay Tres de Mayo, nga andam ug boluntaryo silang mohatag og proteksyon kon hingpit nga mahimong star witness ang usa ka mensahero nga mipagawas og pahayag diha sa social media may kalabotan sa iyang pagpatay.
Sa mensahe sa maong indibidwal, mipahayag siya nga andam siyang mobarug isip saksi ug dili na magpabiling hilom tungod sa iyang kaluoy kang Kapitan Bucol ug sa pamilya niini.
Matod pa sa wala magpailang mensahero, karon lamang siya mipagawas og pahayag tungod sa kahadlok sa iyang personal nga siguridad, apan dili na siya motugot nga mapakyas ang panawagan sa hustisya alang sa kamatayon sa Kapitan.
Sa bahin sa ginikanan ni Kapitan Bucol, gipasalig nila nga buhaton ang tanang legal nga paagi aron masiguro ang kaluwasan ug proteksyon sa maong saksi, subay sa balaod, kon mapamatud-an nga tinuod, lehitimo, adunay basehan ug walay bakak ang mga gipahayag.
Kahibaluang ika-53 ka adlaw na karon sukad sa pagkamatay ni Kapitan Bucol, apan hangtod karon wala pa’y natumbok nga suspek ni napasakaan og kaso, bisan pa sa padayon nga parallel investigation sa kapulisan ug NBI.
