Gipirmahan sa lokal nga panggamhanan sa syudad sa Cagayan de Oro ug sa usa ka kompanya nga nakabase sa nasud Singapore ang kasabutan alang sa pagpatuman og usa ka artificial intelligence kon AI-aided traffic management system kagahapong adlawa, Enero 16.
Katambayayong sa syudad niini nga proyekto ang OneSystems Consortium nga gilangkuban sa OneSystems Integration Philippine Inc. ug OneSystems Technologies Pte. Ltd
Ubos sa kasabotan, adunay ipahigayon nga libre nga pilot installation nga gitumong lamang alang sa technical demonstration, operational system, system validation, ug policy assessment sa AI-assisted traffic management system.
Kahibaluang kaniadtong adlaw’ng lunes, gipalabang sa ika-21 nga Konseho sa Dakbayan, ang usa ka ordinansa nga nagtugot kang Mayor Rolando Uy sa pagsulod ug pagpirma sa Memorandum of Agreement (MOA) uban sa One Systems Integration Philippines, Inc. ug OneSystems Technologies Ltd., Inc. (Singapore).
Kini nga pilot project, langkuban sa tulo ka mga four-way signalized intersections ug maglakip sa pagpahimutang, pagsumpay (integration), operasyon, ug suporta sa tanang component sa sistema.
Dugang pang detalye sa kasabutan nga kining pilot testing, mulungtad sa unom ka bulan sugod sa adlaw nga ma-activate ang sistema. Susihon pa sab sa panggamhanan sa syudad ang technical, operational, legal, ug policy suitability nga aspeto sa Sistema ayha mudesisyon sa citywide deployment ilawom sa Hybrid Public Private Partnership (PPP) arrangement.
Ginalaumawn nga pinaagi sa paggamit niining advanced artificial intelligence nga mga solusyon, mas mapalambo ang dagan sa trapiko, mapamubo ang oras sa pagbiyahe, ug mapalig-on ang kaluwasan sa kadalanan alang sa publiko sa tibuok dakbayan.
Photo courtesy: Cagayan de Oro City Information Office
