Dakong tabang alang sa Department of Education (DepEd) Bukidnon ang mga materyales nga gitunol sa Joint Together Society (GTS), usa ka relihiyosong grupo nga gikan sa Korea, alang sa pagtukod og mga eskwelahan para sa mga Indigenous Peoples (IPs) sa probinsya.
Ang maong inisyatiba gihimo pinaagi sa pakigtambayayong sa lokal nga pangagamhanan ug sa DepEd, nga nagtinguha masulbad ang kakulang sa mga classroom ilabi na sa mga kabukiran. Sumala sa DepEd, walay limitasyon ang paghatag sa GTS sa mga materyales nga gamiton sa pagtukod sa mga eskwelahan.
Matod ni DepEd Bukidnon Schools Division Superintendent Dr. Victoria V. Gazo, bisan pa sa bug-os nga suporta sa GTS sa materyales, gikinahanglan gihapon ang aktibong partisipasyon sa mga Local Government Units (LGUs), ilabi na sa paghatag og manpower alang sa pagpatindog sa mga school buildings.
Gidugang ni Gazo nga importante usab nga istriktong sundon ang mga classroom specifications nga gi-set sa GTS aron masiguro nga lig-on, luwas, ug molungtad og dugay ang mga eskwelahan nga pagagamiton sa mga kabataang IP sa Bukidnon.
Lauman nga pinaagi sa maong kolaborasyon, mas daghang kabataan sa kabukiran ang makabenepisyo sa kalidad nga edukasyon ug mas haum nga palibot sa pagkat-on.
Photo Courtesy: DEPED/LGU DONCARLOS
