Mibisita sa probinsya sa Bukidnon ang 16 ka mga Ambassador sa European Union isip kabahin sa EU SPADE Project Field Visit sa Kaamulan Open Theater kagahapon Enero 15, 2026 aron saksihan ang mga programa ug potensyal sa Bukidnon, ilabina sa sektor sa agrikultura ug turismo.
Gitambungan ang kalihukan ni Senator Juan Miguel Zubiri, Governor Oniel (Rogelio) Roque, Vice Governor Clyde Quiño, mga congressman sa Bukidnon, mga board member, mga head sa nagkadaiyang government agencies, kapulisan, ug ubang mga dinapit nga bisita.
Sa iyang mensahe, gipasigarbo ni Governor Roque ang dato ug buhi nga kultura sa probinsya, ingon man ang dakong kaanyag sa Bukidnon ug gidasig ang mga Ambassador makig-partner sa probinsya alang sa mga inisyatibo nga makatabang sa mga mag-uuma ug lokal nga komunidad.
Sa maong okasyon gipadayag sab ni Senator Zubiri ang dugang nga ₱50 milyones nga budget alang sa Coffee Road Map, ug nipasalig sa kolaborasyon ug suporta gikan sa mga Ambassador sa EU aron mapalambo ang coffee production sa programa samtang gipaila sa mga Ambassador ang taas nga kalidad ug kanindot sa kape sa probinsya, ug ang daghang oportunidad sa kooperasyon niini
Ang presensya sa mga lider sa nasudnon ug lokal nga pangagamhanan nagpakita sa lig-on nga suporta sa mga proyekto nga nagpalig-on sa kalamboan sa probinsya. Gilauman nga ang EU SPADE Project Field Visit magbukas og dugang oportunidad sa panag-partner ug malungtarong kalamboan, nga maghatag og kaayohan sa mga mag-uuma, lokal nga negosyo, ug sa tibuok probinsya sa Bukidnon.
