Andam si Ukrainian President Volodymyr Zelensky nga magpahigayon og bag-ong eleksiyon kon masiguro ang seguridad sa nasud, ug gilauman niyang mahatag dayon sa Washington ang giusab nga mga sugyot sa pagtapos sa halos upat ka tuig nga gubat batok Russia.
Gipangayo ni US President Donald Trump nga dawaton sa Kyiv ang US peace plan, nga gisaway sa ubang kaalyado sa Ukraine tungod kay pabor kini sa Russia. Giakusahan usab ni Trump si Zelensky nga gigamit ang gubat aron malikayan ang eleksiyon, nga nadugay tungod sa martial law.
Sa balaod sa Ukraine, dili pwede mag-eleksiyon samtang nagpatuman og martial law, apan miingon si Zelensky nga andam siya magpatawag og eleksiyon ug nangayo sa parlamento og sugyot aron mahimo kini legal bisan pa sa martial law. Nangayo usab siya og tabang sa US ug mga kaalyado sa Europa aron masiguro ang seguridad sa eleksyon.
Sa miaging mga adlaw, mibisita si Zelensky sa London, Brussels, ug Italy aron hisgutan ang US peace plan, nga naglakip sa paghatag sa Ukraine sa Donbas batok sa garantiya sa seguridad. Giingon niya nga wala’y legal o moral nga katungod nga ihatag ang teritoryo, ug hangtod karon wala pa silay klarong tubag gikan sa mga kaalyado kung unsay buhaton sa sunod nga agresyon sa Russia.
Sa laing bahin, gitawag ni Russian President Vladimir Putin ang Donbas nga “historical territory” sa Russia. Samtang kritikal si Trump sa Europa, giingon sa Pope Leo XIV nga dili realistiko ang peace deal kon wala ang Europa sa panaghisgot, tungod kay ang gubat mismo naa sa Europe.
Photo Courtesy to: BBC
