Gianunsyo sa transport group nga MANIBELA adlawng Huwebes nga mopahigayon sila og tulo ka adlaw nga tigil-pasada (hunong-biyahe) sa tibuok nasud gikan sa Disyembre 9 hangtod 11 isip protesta batok sa giingong sobrang multa ug hinay nga proseso sa mga dokumento sa gobyerno.
Matod ni Mar Valbuena, chairperson sa MANIBELA: “Dili lang ang grupo sa MANIBELA ang mosalmot apan nationwide kini nga kalihukan. Tulo ka adlaw ang tigil-pasada ug posibleng lugwayan pa kini.
Gipadayag sa MANIBELA ang ilang kabalaka sa padayong pagpangayo og provisional authorities sa mga drayber ug operator sa unconsolidated nga mga public utility vehicles (PUV).
Ang Public Transport Modernization Program (PTMP), nga gisugdan niadtong 2017, nagtumong sa pag-ilis sa mga jeepney og makina nga Euro 4-compliant aron mamenosan ang polusyon ug tangtangon ang mga unit nga dili na roadworthy (dili na angay ibiyahe).
Ang usa ka modernong jeepney unit mokantidad og kapin sa Php2 milyon, nga giisip nga mahal ra sa mga drayber ug operator sa PUV, apil na sa mga bangko sa gobyerno sama sa LandBank ug Development Bank of the Philippines. Ang consolidation (paghiusa) sa tagsa-tagsa ka prangkisa sa PUV ngadto sa mga kooperatiba o korporasyon ang unang hugna sa programa.
Gihisgotan usab sa MANIBELA ang giingong kalangay sa rehistrasyon sa mga sakyanan.
Photo courtesy: MANIBELA/Facebook
