Giakusahan ni kanhi Ako Bicol Rep. Zaldy Co si Presidential Son ug House Majority Floorleader Sandro Marcos nga nakabenepisyo usab matud pa sa Php50.9-B nga giingong budget insertions sulod sa General Appropriations Act (GAA) sa lain-laing tuig.
Sa usa ka bag-ong video nga iyang gipagawas kagahapon, Martes, miingon si Co nga “dili lang ang Presidente ang adunay insertion sa budget. Si Congressman Sandro Marcos naa usab matag tuig.”
Base sa alegasyon ni Co, giingon niya nga ang Presidential Son makadawat og dakong pundo kada tuig: PHP9.636 bilyones (2023), PHP20.174 bilyones (2024), PHP21.127 bilyones (2025)
Kinatibuk-ang Php50.938 bilyones, nga iyang giangkon nga gisulod sa nasudnong pondo alang sa proyekto sa laing distrito.
Gihulagway ni Co nga si President Ferdinand Marcos Jr. maoy nagpaluyo sa giingong Php100 bilyones nga insertion alang sa flood control projects, usa ka akusasyong gideny na sa Malacañang.
Sa karon nga pasangil, mibutyag si Co nga giingnan matod pa siya ni Sandro nga tangtangon sa pwesto og pasakaan sa nagkalain-laing kaso kung dili niya ihatag ang Php8 bilyones nga giingong gipangayo sa Presidential Son nga maapil sa national budget.
Giangkon pa niya nga rason niini mao ang pag-advance sa mga contractor ug ang bahin sa pondo nga wala madeposito, hinungdan nga iyang giuli ang kwarta usa ka sulti nga gipanghimakak ni Sandro Marcos.
via: Ferdinand Alexander Marcos/House of Representatives
