Gitataw ni Bangko Sentral ng Pilipinas (BSP) Governor Eli Remolona Jr. nga dili kinahanglan magdali ang BSP sa pagpaubos pag-usab sa Reserve Requirement Ratio (RRR) sa mga dagkong bangko sa nasud.
Sumala ni Remolona, ang kasamtangang 5% nga RRR alang sa commercial ug universal banks kay “ubos kaayo” na, ug naghatag na kini og igo nga kahupayan sa banking sector. Bisan pa, iyang giingon nga posible nga ikonsiderar sa Monetary Board ang dugang pang pagpaubos sa ratio — apan dili kini prayoridad sa pagkakaron.
Giklaro sa BSP nga abli kini sa mga suhestiyon sa pag-adjust sa RRR, depende sa timing, liquidity conditions, ug kinatibuk-ang dagan sa kwarta sulod sa financial system.
Ang RRR mao ang porsiyento sa deposito sa bangko nga kinahanglan nilang i-reserbar ug dili mahimong ipautang. Kini usa ka major nga himan sa BSP aron maseguro ang kalig-on sa liquidity, ilabi na sa panahon nga dako ang panginahanglan sa withdrawal o dihang kinahanglan pugngan ang sobra nga pagdagan sa kwarta sa ekonomiya.
Sa pagkakaron, nagpadayon ang BSP sa pag-assess sa macroeconomic conditions samtang nagpabiling bukas sa posibilidad sa dugang nga kaluwagan alang sa banking sector kung kinahanglan sa ekonomiya.
via: BUSINESSWORLD
