Giisip ni Gilas Pilipinas head coach Tim Cone nga usa ka kritikal nga duwa ang ilang pag-atubang sa Guam sa pagsugod sa unang window sa 2027 FIBA World Cup Asian Qualifiers. Bisan pa man nga mas taas ang ranggo sa Pilipinas No. 37 kumpara sa No. 81 nga Guam klaro nga dili magkompyansa ang Gilas.
Matod ni Cone, ang matag kadaugan sa qualifiers dako og epekto sa ilang tumong nga makaangkon og pundo sa ranking points alang sa 2028 Los Angeles Olympics. Giingon niya nga ang early wins maoy importante aron mapalig-on ang dalan padulong sa mas taas nga international competitions.
Nalakip sa grupo sa Pilipinas ang Guam, New Zealand, ug Australia, diin una nilang ikasangka ang Guam karong Biyernes, Nobyembre 28, sa University of Guam Calvo Fieldhouse.
Kagahapon, Nobyembre 25, mibiyahe na ang Gilas padulong sa Guam. Human sa ilang unang duwa, mobalik dayon ang team sa Pilipinas alang sa sunod nilang assignment karong Disyembre 1, nga ipahigayon sa Ateneo Blue Eagles Gymnasium.
Sa lineup, gidugang ni Cone sila Juan Gomez de Liaño ug Quetin Millora-Brown, nga mokompleto sa roster kauban nila Dwight Ramos, Justin Brownlee, Scottie Thompson, June Mar Fajardo, Japeth Aguilar, CJ Perez, Chris Newsome, Jamie Malonzo, Troy Rosario, ug RJ Abarrientos.
Giingon sa coaching staff nga full preparation ang ilang gi-focus, hingpit nga nagtan-aw sa posibilidad nga ang Guam mopakita og kusganong performance labi na karon nga duwa nila sa ilang kaugalingong homecourt.
Ang Gilas naglaum nga masugdan ang qualifiers sa usa ka lig-on nga kadaugan aron mapaligon ang ilang kampanya padulong sa 2027 FIBA World Cup ug 2028 Olympics.
via: TIEBREAKER
